बागलुङ । बागलुङ र पोखरामा सञ्चालित इमेज बचत तथा ऋण सहकारी संस्थाका अध्यक्ष देवकुमार नेपालीसहित ११ जनाविरुद्ध ठगी मुद्दा दर्ता भएको छ । सहकारी पीडितहरुको संघर्ष समितिले सरकारी वकिलको कार्यालयमार्फत जिल्ला अदालतमा ठगी मुद्दा दर्ता गरेको हो ।
ढोरपाटनका मेयरसमेत रहेका नेपालीसहित उनकी श्रीमती छेला नेपाली, कार्यबाहक अध्यक्ष डोरबहादुर परियार, सचिव सुनील नेपाली, कोषाध्यक्ष लक्ष्मी सेन, सदस्य चित्रबहादुर भण्डारी, रूपा विक र झकबहादुर शाहीविरुद्ध मुद्दा दर्ता गरिएको संघर्ष समितिका संयोजक डिलबहादुर कार्कीले जानकारी दिए ।
कुल एक अर्ब ३० करोड बिगोदाबीसहित १५ सय ४३ जनाको हस्ताक्षरसहित अदालतमा सहकारी मुद्दा दर्ता गरिएको छ । सञ्चालकका लागि आठदेखि १० वर्ष कैद सजाय माग गरिएको छ ।
बचतकर्ताको रकम हिनामिना पारेर बेपत्ता भएका सहकारीका संस्थापक अध्यक्षसमेत रहेका मेयर नेपालीलाई खोजी गरी बचत रकम फिर्ताको माग गर्दै पीडितले प्रहरीमा जाहेरी दिएका थिए । उनी झन्डै दुई महिनादेखि बेपत्ता छन् । उनलाई पक्राउको माग गर्दै बचतकर्ताले सडक आन्दोलनसमेत गरेका छन् ।
