महेन्द्र कौषल, गुल्मी । आरडिटी पोजेटिभ गर्दा पोजेटिभ देखिएका मुसिकोटका १ व्यक्ति क्वारेन्टाईनबाटै भागेका छन् । मुसिकोट नगरपालिका वडा नं ५ ईन्द्रगौँडा स्थित नेपाल राष्ट्रिय माध्यमिक विद्यालयको क्वारेन्टाईनमा बसेका १९ वर्षीय सन्तोष कुमाल क्वारेन्टाईनबाटै भागेका हुन् ।
उनी भारतबाट केही दिन अगाडी आएर वडाकार्यालयले निर्माण गरेको क्वारेन्टाईनमा बसेका थिए । दिउँसो करिब १ बजेको समयमा उक्त क्वारेन्टाईन कुरुवाको रुपमा बसेकाहरुलाई समेत अटेर गरी भागेर गएको वडाध्यक्ष भागिरथ खरेलले जानकारी दिनुभयो । उनको जेठ २९ गते क्वारेन्टाईनको १४ दिनको बसाई अवधि पुरा गरेपछि आरडिटी परिक्षण गरिएको थियो । आरडिटी परिक्षणमा उनको रिपोर्ट पोजेटिभ देखिएको थियो ।
सोही वडा निवासी उनी भुवाचिदी भागेको र अहिले उनको खोजी कार्यका लागि सुरक्षाकर्मीलाई समेत जानकारी गराईएको वडाध्यक्ष खरेलले जानकारी दिनुभयो । कहीँ कसैले अपरिचित व्यक्ति आएको देखेमा खबर गर्न समेत उहाँले आग्रह गर्नुभएको छ ।
