सागर भण्डारी । मुसिकोट नगरपालिका १ बगाहा स्थित बडिगाडखोला लघुजलविद्युत आयोजना विगत १० दिन देखि अवरुद्ध बनेको छ । असार १३ गते वर्षासगैं गएको पहिरोले आयोजनाको झण्डै ४० मिटर नहर बगाएपछि उक्त आयोजना बन्द भएको हो ।
१ सय किलोवाट क्षमताको उक्त आयोजना बन्द हुँदा त्यसक्षेत्रका ९ सय घरधुरीका उपभोक्ताहरु अन्धकारमा बस्न बाध्य भएको अध्यक्ष रामराज घिमिरेले जानकारी दिनुभयो । उक्त आयोजनाको उपभोग गरिरहेका मुसिकोट नगरपालिका वडा नं १ का झण्डै ३ सय घरधुरी, बडिगाड गाउँपालिकाका ३ सय घरधुरी र मालिका गाउँपालिकाका ३ सय घरधुरी अन्धकारमा बस्न बाध्य भएको अध्यक्ष घिमिरेले बताउनुभयो ।
नहर मर्मतका लागि बडिगाड गाउँपालिकाले डोजर उपलब्ध गराएर कुलो मर्मत गरेपनि पुन : १८ गतेको पहिरोले झनै ठुलो परिमाणमा कुलो भत्किएपछि मर्मत गर्न नसकिएको सचिव ढाल बहादुर केसीले जानकारी दिनुभयो । नहर मर्मतका लागि प्रयास गरेपनि सम्भव नभएपछि नगरपालिकाकै सहयोग लिनुपर्ने स्थिति आएको र नगरपालिकालाई सहयोगका लागि अनुरोध गरेको उहाँले बताउनुभयो । नगरपालिकाबाट सहयोग नहुन्जेल कहिलेबाट विद्युत सुचारु हुन्छ भन्नेबारे अन्योल रहेको उहाँको भनाई छ ।
१५ हेक्टर क्षेत्रफलमा रोँपाई प्रभावित
यसैबीच सोही परियोजनाको नहरबाट खेत रोपाईँ गर्दै आएका त्यसक्षेत्रका कृषकहरुको रोँपाई पनि प्रभावित बनेको छ । उक्त क्षेत्रका ओरगति, दगाह, सेनिचौर, भ्रमचौर लगायतका क्षेत्रका कृषकहरुको खेत असार अन्तिमसम्म पनि बाँझै रहने अवस्था आएको मोहन घिमिरेले बताउनुभयो । वर्षातका कारणले सञ्चारविहिन बनेका स्थानीयलाई झन रोपाईँ नै नहुने होकी भन्ने चिन्ताले सताउन थालेको उहाँले बताउनुभयो । केही कृषकहरुले खोल्साखोल्सीको पानीले धान रोपाईँ गरेपनि परियोजनाको नहरकै भरमा धान खेती गर्ने किसानलाई भने यस वर्ष धान रोपाँई प्रभावित बनेको उहाँको भनाई छ ।
