स्टक फोटो
गुल्मी: गुल्मीको कालीगण्डकीमा बिहेभोजपछि फैलिएको कोरोनाबाट दुई जनाको मृत्यु भएको छ भने ७४ जनामा सङ्क्रमण देखिएको छ।
कालीगण्डकी गाउँपालिका-५ मा गत वैशाख १८ गते गरिएको बिहे भोजपछि गाउँलेलाई कोरोनाका मिल्दाजुल्दा लक्षण देखिन थालेका थिए। स्थानीय जीवनदार माध्यमिक विद्यालयको शिक्षकसमेत रहेका ५० वर्षीय पुरुषले १७ गते छोराको विवाह गराइदिए।
दुलही लिन स्याङ्जाको गल्याङ नगरपालिकाको कपर्दीमा वडासदस्य बमबहादुर पहराईसहित ३० जनाको समूह जन्ती बनेर गयो । सरकारले वैशाख १४ गते नै विद्यालय बन्द गरेर २५ जनाभन्दा बढी जम्मा नहुन आग्रह गर्यो।
प्रशासन कार्यालयले पनि त्यसभन्दा पहिले नै पटक-पटक सूचना जारी गर्दै २५ जनाभन्दा बढी जम्मा नहुन आग्रह गर्यो। कालीगण्डकी-५ का जनप्रतिनिधि र स्वयं परिवारले उक्त आग्रह मानेनन्।
वैशाख १८ गते कालीगण्डकीको वडा नं ३, ४ र ५ का गरी ५ सय जति सामूहिक भोजमा सहभागी भए। भोजमा कालिगण्डकीका अध्यक्ष, उपाध्यक्ष, वडाध्यक्षलाई पनि निमन्त्रणा थियो। अध्यक्ष, उपाध्यक्ष गएनन्। वडाध्यक्ष आफू गएनन्, परिवारलाई भोजमा पठाए। बिहेको चार/पाँच दिन अगाडि सामग्री किन्नका लागि दुलाहाका बुबा सुनौली गएको वडासदस्य पहराईले बताए।
वैशाख २१ गतेपछि शिक्षकलाई ज्वरो आउने, रुघा लाग्नेलगायतका समस्या देखिन थाल्यो। थप उपचारका लागि परिवार र छिमेकीले बुटबल जान भने पनि उनले मानेनन्। वैशाख २८ गते पुर्तिघाट स्वास्थ्यचौकीमा जाँच गराए्। एन्टिजेन्ट जाँच गराउँदा पोजिटिभ आएपछि पीसीआरका लागि स्वाब सङ्कलन गरेर तम्घास पठाइयो। यही जेठ १ गते १० बजे बजेपछि श्वासप्रश्वासमा समस्या देखियो भने होस गुमेजस्तो भयो।
पुर्तिघाट स्वास्थ्यचौकीमा अक्सिजन नपाएपछि मिर्मिस्थित एक निजी अस्पतालमा लगियो। सोही दिन राति अस्पतालले मृत्युको घोषणा गरिदियो भने पीसीआर रिपोर्ट पोजेटिभ भएको जानकारी आयो। केही दिनदेखि कोरोनासँग मिल्दाजुल्दा लक्षण देखिएपछि स्थानीय ५६ वर्षीया महिलाको पीसीआरका लागि स्वाब लिइ परीक्षणका लागि तम्घास पठाइएको थियो।
उनी १८ गतेको बिहेभोजमा सहभागी थिए। जेठ १ गते नै साँझपख बिहे भोजमै सहभागी भएकी उनलाई श्वासप्रश्वासमा समस्या देखियो। थप उपचारका लागि पुर्तिघाट ल्याए पनि ज्यान गएको वडासदस्य बोमबहादुरले बताए।
८१ प्रतिशत गाउँबासीमा संक्रमण
कोरोना महामारीमा गरिएको बिहेभोजपछि स्थानीयवासीमा लक्षण देखिन शुरु गरेका वडासदस्य बोमबहादुरले बताए। स्थानीयलाई रुघा तथा पखाला लाग्ने हुँदाहुँदै पनि खानेपानी आयोजनाको पाइपका लागि लाइन खन्ने काम जारी थियो। एकातर्फ ठूलो सङ्ख्यामा बिहेभोजमा उपस्थित हुनु र अर्कोतर्फ खानेपानीको लाइन खन्ने काम नै फोक्सिङमा कोरोना फैलिनुको मुख्य कारण रहेको बोमबहादुरले बताए।
स्थानीयवासीमा कोरोनाका मिल्दाजुल्दा लक्षण देखिन शुरु गरेपछि यही जेठ २ गते ९४ जनाको स्वाब संकलन गरियो। जेठ ४ गते साँझ प्राप्त रिपोर्टमा ७४ जना अर्थात् ८१ प्रतिशत नागरिक कोरोना सङ्क्रमित भएको गाउँपालिकाका स्वास्थ्य अधिकृत चन्द्रबहादुर थापाले जानकारी दिए।
सङ्क्रमितमध्ये ३१ पुरुष र ४३ महिला छन्। दुई वर्षको बच्चादेखि ७१ वर्षका नागरिकसम्मलाई कोरोना सङ्क्रमण भएको थापाले बताए। गाउँलेलाई अहिले रुघाखोकी र ज्वरो आउने समस्या देखिएको छ। वडासदस्य पहराईले नागरिक बढी आत्तिए पनि गाउँपालिकाबाट समस्या समाधानका लागि कुनै पहल नभएको गुनासो गरे।
रेडियो सारथीबाट
