भारतको केरलास्थित वायनाड जिल्लाको मेप्पडीमा गएको पहिरोमा परि कम्तिमा १९ जनाको मृत्यु भएको छ । भारी वर्षापछि मंगलबार गएको भीषण पहिरोमा परी सयौँ व्यक्ति बेपत्ता भएको भारतीय सञ्चारमाध्यमहरूले जनाएका छन् ।
सरकारी अधिकारीहरूलाई उद्धृत गर्दै जी न्युजले आफ्नो अनलाइन संस्करणमा हालसम्म १९ जनाको मृत्यु भएको पुष्टि गरेको छ । उक्त घटनामा परी सो स्थानमा बस्दै आएको नेपाली परिवारका १ वर्षीय बच्चा पनि रहेको जी न्युजको समाचारमा उल्लेख छ ।
मुडक्कई, चुरलमाला, अट्टामाला तथा नुलपुझा गाउँ पहिरोबाट प्रभावित भएको बताइएको छ । बीबीसी हिन्दीले पहिरोमा परी ठूलो संख्यामा मानिसहरू बेपत्ता भएको उल्लेख गरेको छ ।
पहिरोमा परेकाहरूको उद्धार र राहतको काम सुरु गरिएको जनाइएको छ । भारतीय राष्ट्रिय आपदा मोचन बल परिचालित भइसकेको छ भने भारतीय वायुसेना पनि उद्धारमा खटिएको समाचारमा उल्लेख छ ।
भारतीय प्रधानमन्त्री नरेन्द्र मोदीले घटनाप्रति दुःख व्यक्त गर्दै उद्धार अभियान सुरु भइसकेको उल्लेख गरेका छन् । केरलाका मुख्यमन्त्री पिनाराई विजयनसँग आफूले कुरा गरेको पनि मोदीले जानकारी दिएका छन् ।
